¿Qué son falordias? as falordias son cuentos, son ixas chiquetas istorias que os yayos, y os no tan yayos, les contaban a os ninóns, antiparti de ta pasar o tiempo, feban redir, u rechirar o tozuelo.
As falordias pueden ser feitos pasaús, pero cuasi siempre son inbentaús y ta fer treballar a imaxinazión. Tamién pué ser que o que la cuente acabe de discurrila en ixe inte.
A yo me fa goyo escribir falordias, d´antis y de agora: d´animals, de lugars, de chens libres por o monte, de fuéns que nunca se secan, de nugueras con esquiruelos, manzaneras con chabalins, barranqueras con crebauesos, u rabaños de güellas con perros y esparberos que las otilan.
Paisaches grandismos y desconoxiús. De a maxia, en a solera de os Treseróls, Mondoto, Castillo Mayor, Peña Solano u Peña Montañesa. Y no falta escurrir muito. Os cuentos, as falordias son astí… solo fan falta güellos agudos, orellas ubiertas y chen ta leyelas u ascuitalas.
¿Qué ye a nuestra fabla? a nuestra fabla ye l´aragonés, ixas trazas de charrar que yeran astí antes de o castellano, y que han siú a traza de´espresión de istas chens, de siempre, anque no se escribise ni se charrase con frasteros. En a escuela no s´eba amostraú ni se escribiba dende fa cuatro sieglos lomenos. Pero os yayos y os pais nos charraban asina, por ixo yo tiengo que charrar y escribir, ye l´alazé de o patrimonio cultural.
